Поранешниот шеф на Ф1, Берни Еклстоун ги предводеше посветите кон поранешниот претседател на ФИА, Макс Мозли, кој почина денеска на 81 година по долга борба со ракот.
Мозли и Еклстоун беа главните луѓе во Формула 1 со децении и успеаја да го трансформираат спортот во глобална машина за пари, и честопати беа обвинувани дека се „автократи“.
„На чуден начин, ние двајца бевме како браќа и секогаш си верувавме. Најлошата работа која ја направив во мојот живот е што не го поддржував кога ги имаше тие проблеми со медиумите. Но, освен, тоа никогаш не се лутевме и секогаш бевме блиски пријатели. Двајцата потекнувавме од различни семејства, јас од работничко, тој од аристократско, но добро се согласувавме и си верувавме. Направивме многу за Ф1 на свој начин. Макс беше искрен човек кој не сакаше да слуша глупости и беше доста строг“, изјави Еклстоун.