Македонскиот автомобилист Игор Стефановски, по пауза од седум години, повторно ќе вози во Европскиот шампионат на ридски патеки, под капата на ФИА. Иџе ги освои титулите во 2014 и во 2015 година, па сезонава како искусен ќе ја предизвика новата конкуренција, на старите патеки.
Новата сезона почнува овој викенд во Франција, во Сен Жан ди Гар, местото каде што Иџе ја оствари својата прва победа. Во овие седум години, Европскиот ридски шампионат претрпе промена во системот на натпреварување, односно во класификацијата на возилата, па затоа тој со своето Хјундаи И30 ќе се трка во класа со помоќни автомобили.
„Отсекогаш сум имал високи амбиции и сум целел на највисок пласман. Така ќе биде и сега, но прво ќе видиме како ќе биде со промените во Европскиот ридски шампионат. Воведен е тој „Перформанс фактор“, тој е новина за мене и ќе видиме како ќе се однесува и мојот автомобил и на кое ниво ќе бидат конкурентите во мојата категорија. Ова е сепак прва трка, а по неа ќе ги направиме потребните приспособувања на автомобилот, бидејќи тој е истиот со кој се натпреварував на кружните трки. Ова е сепак, друг тип на предизвик. Според мене ридските трки се една од најтешките дисциплини, која бара висок фокус во секој момент од трката“, изјави Иџе.
Во претходните седум години Иџе настапуваше во ЕТЦЦ, ТЦР-Европа, ТЦР-Италија и ТЦР-Источна Европа шампионатите на кружни патеки.