Актуелните Ф1 шампиони Мерцедес имаа шанса да го тестираат прототипот на новите гуми на Пирели од 18 инчи, пред трансферот на вакви пошироки гуми во 2021 година.

Формула 1 и следната сезона ќе вози со 13-инчни гуми, пред големите промени во спортот од 2021 година. Пирели имаа првични тестови со Рено и Мекларен на патеката Пол Рикар во Франција оваа година, а денеска Мерцедес имаше шанси да види како функционираат пневматиците на тестот на патеката Јас Марина во Абу Даби.

Зад воланот беше возачот на Вилијамс и дел од академијата на Мерцедес, Џорџ Расел, кој комплетираше над 100 круга. Според регулативите, Пирели, кој останува единствен снабдувач на пневматици до 2023 година, го диктира тестирањето со тимовите, а податоците ги споделува со сите тимови за никој да нема предност. Формула 2 шампионатот ќе се префрли на пошироките гуми веќе следната сезона за да се добие подобра слика за тоа што ќе донесат промените.