Дизајнерскиот „гуру“ на Ред бул рејсинг, Адријан Њуи вели дека последниот круг од последната Ф1 трка во 2021, кога Макс Ферстапен стигна до драматичната победа над Луис Хамилтон е ситуација во која бил „најблиску до срцев напад“, и го пофали карактерот на новиот светски шампион.
Откако во текот на целата трка шансите за титула на Ферстапен изгледаа далечни поради супериорната брзина на Хамилтон и Мерцедес, во најдраматична можна завршница на рестарт во последниот круг, Ферстапен го помина Хамилтон и стана светски шампион на 24 години.
„Во таква трка имаш многу емоции. Круговите пред безбедносното возило, изгледаше дека титулата ни избега. Тогаш размислуваш за целата сезона и што си можел да направиш поинаку. Некои несреќни моменти, излетувањето во Силверстоун, кое уште лично многу ме нервира. И потоа дојде безбедносното возило, и имавме среќа, не може да се скрие тоа. Но, иако сум пристран, сметам дека Макс го заслужи трофејот. Ова е титула во која бев најблиску до срцев напад и несвестица. Имавме и други ситуации во кои се одлучуваше во последната трка, но никогаш во последниот круг“, вели Њуи.
Човекот кој дизајнираше шампионски болиди за Вилијамс, Мекларен и Ред бул, го поставува Фертсапен високо на листата на најдобри возачи со кои работел.
„Тешко е да се дава таква оценка, но тој мора да е многу високо, нели? Тој е вистинското. Да, тој е агресивен, но многу фер возач. Има огромен талент и брзина, а сите забораваат колку е млад. Најдоброто за него е тоа што е лесно да се работи со него. Нема претенциозност, нема политика – доаѓа, го прави тоа што му е работа. Го сакам момчето“, додава Њуи.