Со победата на Макс Ферстапен на трката за ГН на Канада во Монтреал, Ред Бул стигна до 100. триумф во Формула 1. Ред Бул со оваа победа влезе во кругот на тимови кои имаат постигнато повеќе од 100 победи.
Првото место на вечната листа и натаму го зазема Ферари со 242 триумфи, а потоа следуваа Мекларен (183), Мерцедес (125) и Вилијамс (114).
Актуелниот светски шампион Макс Ферстапен му донесе најмногу триумфи на Ред Бул. Холанѓанецот 41 пат се искачи на највисокото скалило на подиумот. Втор е Себастијан Фетел со 38.
Покрај двата шампиони, триумфи на австрискиот тим му донесоа и Марк Вебер (девет), Даниел Рикиардо (седум) и Серхио Перез (пет).
Ред Бул моментално е во серија од девет победи. Доколку Ферстапен или Перес слават во Австрија на 2 јули, тоа ќе биде нивна 10. последователна победа, што би била најдолгата серија во историјата на тимот.