Мичел Бергкамп, синот на легендата на Арсенал, Денис Бергкамп, нема да добие договор од „топчиите“ откако помина една недела на проба во „Лондон Колни“ центарот на тимот.
Фудбалерот од средниот ред беше без договор откако во текот на летото замина од холандскиот клуб Алмере сити, каде што беше дел од младинската академија и работеше една недела со У-23 тимот на Арсенал, предводен од Стив Булд.
Младиот Бергкамп порасна во Лондон и беше на теренот кога неговиот татко го одигра прошталниот меч против Ајакс во 2006 година, меч кој официјално го отвори новиот стадион „Емирати“.
„Мојот татко играше и за Интер и Ајакс, два прекрасни клубови, но во Арсенал се чувствувам како дома. Би сакал да играм на стариот ‘Хајбери’ бидејќи уште се сеќавам“, изјави тој неодамна.
Таткото на 22-годишниот фудбалер, Денис Бергкамп одигра 423 меча за Арсенал во 11 години од 1995 до 2006. 51-годишниот Холанѓанец постигна 120 гола за „топчиите“ освојувајќи три титули од Премиер лигата.