Вечерва, од 21:00 часот на „Алијанц Арена“, Баерн го чека Пари Сен Жермен, кој доаѓа во Минхен со предност од 5:4 од првата средба на „Паркот на принцовите“.
Пред осум дена во Париз, овие тимови одиграа антологиски натпревар, еден од најдобрите во историјата на елитното натпреварување.
Навивачите, како и неутралните фудбалски фанови, се надеваат на исто или барем слично сценарио кога станува збор за ефикасноста.
Многумина веруваат дека ова е практично „финале пред финалето“, знаејќи дека Арсенал, кој го елиминира Атлетико (2:1), не беше особено убедлив.
Трилер каков што се случи во француската престолнина ретко се гледа, особено во оваа фаза од натпреварувањето.
За време на викендот, Венсан Компани и Луис Енрике успеаја да ги одморат главните ѕвезди за еден од најочекуваните натпревари во годината.
Девет гола во првите 68 минути во Париз ја оставија публиката желна за повеќе во реваншот.
Баерн знае дека им е потребна победа од најмалку два гола, додека ПСЖ едноставно мора да избегне пораз. Доколку Баварците слават со еден гол, се оди на продолженија, а потенцијално и на пенали.
„Повеќе, уште повеќе“, рече Компани кога беше прашан дали Баерн би играл со слична жестокост и слобода во реваншот.
Шампионите на Бундеслигата едноставно не се во можност да играат поинаку, нивното напаѓачко оружје е ослободено со полн потенцијал во секој натпревар. Исто така, малку е веројатно дека ПСЖ ќе ја промени својата тактика. Иако можат да си дозволат малку поконзервативна поставеност на играта, момците на Енрике сигурно ќе играат со застрашувачко темпо и во Минхен.
Бројките се во корист на Баерн. Статистички, тие беа подобри и на првата средба, тука е и предноста на домашниот терен (само еден пораз во последните 29 натпревари во ЛШ и победа во 20 од 23 натпревари на Алијанц Арената оваа сезона).
Тука е и факторот Хари Кејн, кој постигна дури 54 гола во 47 натпревари оваа сезона.
Не треба да се очекуваат промени во составот на Баерн. Рафаел Гереиро и Серж Гнабри сè уште се отсутни, додека тинејџерот Ленарт Карл е под знак прашалник.
Ашраф Хакими нема да игра за ПСЖ поради повреда, а најверојатно ќе биде заменет од Ворен Заир-Емри, што би отворило простор во средината за Фабијан Руиз да го започне натпреварот овој пат. Напаѓачкиот трилинг Дуе-Дембеле-Кварацхелија ќе биде главната опсност по голот на Ноер.
Фото/ ЕПА