Атлетик Билбао освои бод на „Ноу Камп“ откако во седмото коло одиграа 1:1 со Барселона. Барса од пораз ја спаси Мунир со голот во 84.минута.
Барселона и на третиот меч по ред остана без победа, откако претходно одиграа 2:2 со Џирона и беа поразени од Леганес 2:1.
Ернесто Валверде повторно ротираше во составот, мечот против својот поранешен клуб го започна без Лионел Меси, што борбените Баски знаеја да го искористат.
Актуелните шампиони за разлика од претходните два натпревари делуваа добро на теренот, создаваа шанси, меѓутоа беа лоши во завршниците од акциите.
Луис Суарез во првиот дел два пати не успеа да го совлада тинејџерот на голот на Атлетик, Унаи Симон. Во вториот дел Барселона преку Кутињо и Меси, кој влезе на теренот во 55.минута, еднаш ја погоди гредата, а еднаш дирекот.
Кога не ги искористија тие шанси, Каталонците бод спасија преку Мунир, кој погоди по асистенцијата на Меси.
Претходно Атлетик стигна до водство во 41.минута преку Де Маркос, кој одлично ја заврши акцијата на Сусаета.
Барселона по седум кола има 14 бода.