Барселона подготвува алтернативни решенија во нападот, откако трансферот на Хулијан Алварез од Атлетико Мадрид станува сè потежок за реализација.
Според наводите, тренерот на Барселона, Ханси Флик, не го сака Жорж Микаутадзе како опција за нападот, бидејќи смета дека обесштетувањето од 60 милиони евра е превисоко. Германскиот стратег наводно бара подостапен напаѓач кој би прифатил улога во ротацијата, а една од опциите е Луис Суарез од Спортинг Лисабон.
Станува збор за 28-годишниот колумбиски напаѓач, кој нема никаква поврзаност со легендарниот уругвајски Луис Суарез, но има одлична сезона зад себе во дресот на Спортинг.
Суарез на 54 натпревари постигнал 38 голови и запишал девет асистенции. Тој минатото лето пристигнал во португалскиот клуб од Алмерија за 23 милиони евра, како замена за Виктор Ѓокереш.
Претходно во кариерата настапувал и за Олимпик Марсеј, но во Франција не се наметнал и на 11 натпревари постигнал само три гола. Многу подобар период имал во Алмерија, каде што на 79 натпревари постигнал 41 гол и забележал 13 асистенции.
Според проценките, неговата моментална пазарна вредност е околу 30 милиони евра, па Барселона би можела да го доведе за сума нешто повисока од таа.
Суарез би бил опција за ротација и поевтина алтернатива во нападот.
Останува да се види дали Барселона навистина ќе се одлучи за колумбискиот напаѓач како свој „план Б“ доколку трансферот на Алварез не биде реализиран.