Челси се подготвени да ја намалат сумата која Интер ќе треба да ја плати за позајмица на нивното рекордно засилување Ромелу Лукаку, тврди порталот „Гол“, откако во англискиот клуб сметаат дека односите со белгискиот напаѓач не можат да се поправат.
Ова доаѓа откако Лукаку, за кого Челси платија 100 милиони фунти, самиот „турка“ за заминување од „Стемфорд Бриџ“ преку својот нов адвокат Себастиен Ледур. Челси бараа 25 милиони евра за позајмицата, но сега се подготвени да се договорат за сума од 12 милиони евра, додека последната понуда на Интер е само 7 милиони евра.
Ситуацијата со Лукаку не се смени ниту со доаѓањето на новите газди, „Клирлејк капитал“ предводени од Тод Бели, и главните луѓе во тимот сметаат дека под водство на Томас Тухел не може да се извлече максимум од Лукаку, а не помогнале ниту обидите да му се „угоди“ на Белгиецот.