Еден од лидерите на Манчестер Сити, Кевин де Брујне, изјави дека евентуален триумф во Лигата на шампионите ќе го промени начинот на кој навивачите го перципираат клубот од „Етихад“. Но, мора да одиграат максимално одговорно, затоа што само малку ако потфрлат, тоа Реал Мадрид ќе знае да го искористи.
Манчестер Сити го доби првиот полуфинален натпревар во Англија со 4:3, а вториот натпревар е утревечер во шпанската престолнина.
„Секој играч сака да освојува трофеи, така е и со нас. Во ова натпреварување квалитетот е врвен и затоа е толку тешко да се победи. Но, гледајќи наназад, мислам дека игравме одлично во последните години. Утре можеме да направиме уште еден чекор напред“, изјави Де Брујне.
Тој вели дека Манчестер Сити не смее да си дозволи грешка на „Сантјаго Бернабеу“.
„Ако одиграме дури и малку под нашите можности, Реал Мадрид може да го добие натпреварот бидејќи тие се меѓу најдобрите тимови во светот. Имаат неверојатно квалитетни фудбалери. Но, мислам дека можеме да се пласираме во финалето“, дополни 30-годишниот Кевин де Брујне.