Девојката на романскиот младински репрезентативец Кристијан Манеа заврши во болница по тепачката која се случи по мечот од Европското првенство против Франција во понеделникот навечер.
Мечот на стадионот „Мануци“ заврши без победник и без голови, резултат кој ги однесе двете репрезентации во полуфинале, меѓутоа по крајот на мечот, на трибините имаше тепачка додека Манеа се обидуваше да стигне до неговата девојка, која заврши со крваво лице откако била турната на земја.
„По крајот на мечот имаше инцидент. Кристијан Манеа одеше кај неговата девојка, кога некој ја турна за да се фотографира со него. Братот на девојката сакаше да помогне, но и тој беше турнат. Таа беше однесена во болница, но набргу потоа пуштена. Манеа не беше вклучен во тепачката. Полицијата го истражува инцидентот и ги бара луѓето кои ја нападнаа девојката“, се вели во соопштението на Романската фудбалска федерација.
Инцидентот фрли сенка на одличниот настап на Романија, кој беше проследен од 10.000 романски фанови во Чезена. Романија игра со актуелните шампиони Германија во Болоња во полуфиналето во четврток.