Гранит Џака веќе се договорил со Херта Берлин за трансфер од Арсенал во јануари, тврди неговиот агент, Жоел Ногуера.
Џака е во „немилост“ на навивачите на Арсенал откако ја загуби капитенската лента на почетокот на ноември по бурната реакција и пцуењето на навивачите при замената. Сепак, новиот тренер Микел Артета му даде 90 минути против Бурнемаут во првиот меч на „Боксинг деј“, кој заврши 1:1.
Ногуера за швајцарскиот „Блик“ тврди дека договорот е веќе склучен и сега треба да се услогласат двата клуба.
„Ќе го кажам тоа искрено, имаме договор со Херта и би сакале да одиме во Берлин. Му го кажав тоа на Раул Санлехи и на Еду, како и на новиот тренер Микел Артета. Арсенал се информирани и сега треба да се услогласат само парите кои треба да се разменат меѓу тимовите“, вели Ногуера.
Херта, каде што нов тренер е легендарниот Јирген Клинсман, ќе дадат околу 21 милиони фунти за швајцарскиот репрезентативец, иако Артета најави дека нема намера да го продава фудбалерот од средниот ред.