Велшкиот фудбалер Герет Бејл повеќе не е член на Реал Мадрид. По девет години во славниот тим од шпанската престолнина, 32-годишниот напаѓач со порака на социјалните мрежи се прости од навивачите. Останува да се види каде ќе ја продолжи кариерата.
Поранешниот играч на Саутемптон и Тотенхем со кралскиот клуб минатиот викенд го освои петтиот трофеј во Лигата на шампионите, во Париз избраниците на Карло Анчелоти го совладаа Ливерпул.
Во писмото Бејл им се обраќа на сите негови поранешни и сегашни соиграчи, тренери, стручен штаб и навивачи кои секогаш го поддржувале.
„Дојдов овде пред девет години како млад човек кој сакаше да го оствари својот сон и да игра за Реал Мадрид. Да го носам белиот дрес, грбот на градите, да играм на „Сантијаго Бернабеу“, да освојувам титули и најважното – да се освои Лигата на шампионите Кога ќе погледнам наназад, искрено можам да кажам дека овој сон стана реалност и многу, многу повеќе од тоа. Да се биде дел од историјата на овој клуб и да се постигне сето она што успеавме да го направиме додека бев играч на Реал Мадрид беше неверојатно искуство за мене и нешто што ќе го паметам до крајот на мојот живот. Сакам да им се заблагодарам на Флорентино Перез, Анхел Санчез и целото раководство што ми даде шанса да играм за овој клуб. Заедно успеавме да оствариме моменти кои ќе останат запаметени засекогаш во историјата на овој клуб. Ми беше чест. Благодарам. Благодарам Мадрид!“, пишува во писмото.
Бејл во Реал пристигна во летото 2013 година за отштета од 101.000.000 евра. Со исклучок на еден период 2020-2021 година. година, кога се врати во Тотенхем како позајмен играч, цело време беше во Реал.
Последните години од неговиот престој во Реал не беа толку успешни, тој често отсуствуваше од тимот, а клубо јавно кажуваше дека сака да го продаде.
It has been an honour. Thank you! #HALAMADRID @RealMadrid pic.twitter.com/T7FL2LNRrD
— Gareth Bale (@GarethBale11) June 1, 2022