„Фенерџијата“ во италијанската Серија А, Салернитана не успеа да стигне до својата четврта победа оваа сезона и покрај двата прекрасни голови од слободен удар на новиот фудбалер во тимот, Симоне Верди, одигрувајќи 2:2 со Специја.
Верди, кој во јануарскиот преоден рок дојде како позајмен фудбалер од Торино, во 3. минута од мечот постигна прекрасен гол од слободен удар, но гостите бргу израмнија во 12. минута кога беше досуден пенал, а Реј Манај беше прецизен од белата точка. Само четири минути подоцна беше досуден уште еден слободен удар за Салернитана, овојпат од поголема далечина, но тоа не му пречеше на Верди да забие уште еден, уште поубав гол.
Меѓутоа, среќата не го посака тимот од јужна Италија откако во 30. минута беше досуден уште еден пенал, кој Даниеле Верде го реализираше за ново израмнување. До крајот на мечот остана истиот резултат, така што Салернитана останува последна со 11 поени, девет поени под безбедната зона. Специја, пак, се на 15. место со 26 освоени поени.