Агентот на Марио Балотели, Мино Рајола, вели дека италијанскиот напаѓач преговара со клубови од Премиер лигата за враќање во Англија по успешната сезона со францускиот клуб Ница.
Балотели, кој во минатото играше и за Манчестер сити и Ливерпул, останува без договор на крајот на сезоната, откако полека го врати својот фудбалски углед откако стана попознат по своите инциденти отколку по умешноста со топката.
Балотели немаше најдобар престој во Ливерпул, но беше поуспешен со Сити, освојувајќи ја титулата од Премиер лигата со Роберто Манчини. Рајола вели дека неговиот клиент е во „зоната од 100 милиони евра“ и верува дека следниот клуб ќе го земе евтино.
„Марио е подготвен да се врати на големата сцена и созреа во еден од најдобрите 10 напаѓачи на светот. Во Италија тој сигурно е број 1 и вреди 100 милиони евра. Бидејќи ќе стане слободен играч, тој е вистинска прилика. Разговарам со повеќе клубови во Англија и Италија. Со Јувентус, Рома, Наполи и Интер во Италија, на пример“, изјави Рајола.
Балотели имаше солидни две сезони во Франција со 39 гола во 58 настапи за Ница во сите натпреварувања.