Фудбалерите на Црвена звезда синоќ ја забележаа првата победа сезонава во Лигата на шампионите. На домашен терен го декласираа Штутгарт со 5.1. За победата фудбалерите ќе добија големи премии.
Генералниот директор на Црвена звезда, Звездан Терзиќ откри важен детал од средбата пред натпреварот против Штутгарт.
„Одржав состанок со играчите и им кажав дека ќе победиме и дека мора да веруваат во победата. Им ветивме огромна премија за три бода. Верувавме во победа и тоа им го пренесовме на играчите. Со денови чувствувам добра енергија на тренинзите и им кажав дека имаме извонредни играчи, извонреден тренер, и покрај претходните резултати, верувавме во тоа што го правиме“, изјави Терзиќ.
Тој потоа го пофали својот тим.
„Ова е една од најголемите европски победи во историјата на Црвена звезда. Оваа победа е потврда дека се создава голема Црвена звезда. Верувам дека цела Европа вечерва зборува за Црвена звезда. Ги поканувам сите наши навивачи да дојдете на нашите натпревари и во домашното првенство бидејќи тоа е подготовка за европските натпревари, на нашите играчи им треба поддршка, се е полесно со големата поддршка од нашите навивачи, среќен сум, верувам дека цела Србија е среќна“, заклучи Терзиќ.