Премиерлигата по принудната пауза по смртта на кралицата Елизабета Втора се врати со два интересни петочни мечеви, од кои посебно импресионираше неверојатниот камбек на Фулам за 3:2 победа кај Нотингем форест.
Таиво Авојини им донесе водство на Форест по само 11 минути игра, и со овој резултат се отиде на полувреме, пред тимот на Марко Силва да направи вистинска опсада на голот на домаќините, постигнувајќи три гола во шест минути. Кени Тете израмни во 54. минута, за само три минути подоцна Палиња да ги донесе Фулам во водство, за во 60. минута, Херисон Рид да донесе два гола предност. Нотингем само успеа да намали на 2:3 во 77. минута преку Луис О’Брајан.
Со третата победа оваа сезона, Фулам се искачи на шестото место на табелата, додека Нотингем и покрај тоа што во преодниот рок донесоа 21 фудбалер, се на претпоследното место со само 4 освоени поени.
На „Вила парк“, пак, се намали притисокот на менаџерот Стивен Џерард, откако Џејкоб Ремзи им донесе 1:0 победа над Саутемптон, прв триумф по пет меча за Астон вила.
ПРЕМИЕРЛИГА, 8.КОЛО
Нотингем форест – Фулам 2:3
Астон вила – Саутемптон 1:0