Германија стана првата европска репрезентација која се квалификувала на Светското првенство во Катар во 2022, откако на Арената „Тоше Проески“ имаа слатка одмазда со 0:4 победа над Македонија, сведувајќи ги нашите шанси за второ место на табелата на ниво на теорија.
Со оваа победа, тимот на Ханси Флик, го стави во втор план шокантниот 1:2 пораз од Македонија во првиот меч во Дуизбург, и со седум победи во осум меча осигураа билет на Мундијалот. Мечот исто така беше посебен за Тимо Вернер, кој даде два гола за четири минути за да се оправда за промашувањата во првиот меч.
Од стартот на мечот стана јасно дека Германците одат на победа во Скопје, со постојан притисок на нашиот гол, и само одличниот Столе Димитриевски успеа да спречи водство на гостите, како и Тимо Вернер, кој ја погоди гредата во финишот на полувремето.
Но, во вторите 45 минути, „маншафт“ ја покажа силата. Прво во 50. минута, на совршена контра, ја истрчаа нашата одбрана и Каи Хаверц им донесе водство. Потоа на сцена стапи напаѓачот на Челси, Тимо Вернер, кој во 70. минута постигна прекрасен гол, за само четири минути подоцна да зголеми на 0:3. Џамал Мусијала, новата надеж на германскиот фудбал во 83. минута го претвори убедливиот триумф во вистинска катастрофа за тимот на Благоја Милевски.
Бидејќи Романија со 1:0 ја совлада Ерменија за своја одмазда, сега Романците се во совршена позиција да го обезбедат второто место – до крајот имаат домашен меч со Исланд и гостување кај Лихтенштајн, и со две победи сигурно ќе бидат втори, бидејќи имаат еден поен пред Македонија.
Графика: Sofascore за Топспорт.мк
СП 2022 КВАЛИФИКАЦИИ, ГРУПА Ј
Македонија – Германија 0:4
Романија – Ерменија 1:0
Исланд – Лихтенштајн 4:0