Руд Гулит вели дека како сите навивачи на Челси тој би сакал Еден Азар да остане и следната сезона на „Стемфорд бриџ“, но верува дека тој ќе стане играч на Реал Мадрид ако тие направат понуда, бидејќи „никој не го одбива Реал“.
28-годишниот Белгиец има уште една сезона од договорот со „сините“, но подолго време зборува за желбата да игра во „кралскиот клуб“, посебно под тренерот Зинедин Зидан, кој повторно се врати на кормилото на „Бернабеу“. Гулит, кој е поранешен тренер на Челси, вели дека е невозможно да се отфрли таа желба.
„Прво, мора да биде јасна ситуацијата со тренерот, и се надевам дека Сари ќе остане и ќе му дадат време да го изгради тимот. Има многу фудбалери во Премиер лига за кои велат дека ќе си одат, Пол Погба, Андер Ерера, Кристијан Ериксен… Никој не може да оддолее на предизвикот на Реал. Тоа е најголемиот клуб на светот и тешко е да кажеш не кога ќе дојдат по тебе“, вели Гулит.