Долгоочекуваниот трансфер на Ромелу Лукаку во Интер може да се оствари набргу, откако Манчестер јунајтед се подготвени за „трампа“ со проблематичниот аргентински напаѓач, Мауро Икарди, јавува британскиот „Експрес“.
Лукаку подолго време е поврзуван со трансфер во Интер, посебно откако стана јасно дека нема да има стартна позиција во тимот на Оле Гунар Солскјер, додека во исто време управата на италијанскиот тим сака да се ослободи од Икарди.
Според „Кориере дело спорт“, новиот тренер на „нераѕурите“, Антонио Конте јасно кажал дека Икарди не е во план за следната сезона и тоа во директен разговор со агентот на Икарди, Ванда Нара.
Икарди беше капитен на Интер до февруари, кога претходниот тренер Лучано Спалети му ја предаде капитенската лента на Самир Хандановиќ поради конфликти со Икарди. Нара и Икарди постојано тврдат дека тој ќе остане на „Џузепе Меаца“, меѓутоа ситуацијата сега не изгледа розово за нив.