Кристијано Роналдо се врати на тренинзите со првиот тим на Манчестер Јунајтед, откако беше суспендиран од менаџерот Ерик тен Хаг затоа што не го чекаше крајот на дербито со Тотенхем и реши предвреме да замине во соблекувалната. Покрај тоа, тој одбил и да влезе во игра како резерва на споменатиот меч.
Португалецот изминативе денови тренира индивидуално и ја пропушти пресметката со Челси. Во неделата и понеделникот тимот имаше одмор, а денеска играчите се вратија во базата во Карингтон за да се подготват за дуелот со Шериф во групната фаза од Лигата на Европа.
Се уште не е јасно дали Роналдо ќе биде вклучен во составот за овој натпревар.
Денеска се очекуваше да има и разговор меѓу Роналдо и Тен Хаг, но според „Скај Спортс“, всушност не се случил таков посебен разговор бидејќи двајцата биле во постојан контакт во последните денови.
Покрај Португалецот, денеска со тренинзи продолжија и Хари Мегваер, Дони ван де Бек и Арон Ван-Бисака. Антони Марсијал и Рафаел Варан остануваат повредени и не тренираат со тимот.