Аргентинскиот напаѓач во дресот на милански Интер – Лаутаро Мартинез е во татковината и се подготвува за почетокот на новата сезона.
Во разговор за „TuttoMercatoWeb“ зборуваше за неговите долгорочни планови, но и за некои малку познати детали од неговиот живот, меѓу другото раскажа и дека бил во ситуација да побара помош од психолог.
„Тешко ми беше да работам на менталитетот и на пристапот. Кога станав татко, почнав полесно да се носам со работите надвор од теренот. Но ми требаше помош од психолог за она на теренот. Проблемот е во тоа што добивав премногу жолти картони. Но се поправив. Погледнете ја статистиката и ќе ви стане јасно“ вели тој.
На прашање каде сака да ја заврши кариерата, тој ги воодушеви Аргентинците.
„На крајот сакам кариерата да ја завршам во Линиерс, клубот од детството. Ќе се обидам да ја наговорам сопругата да се вратиме во Бахија Бјанка. Се надевам дека уште еднаш во животот ќе заиграм за Линиерс или Расинг, но во фудбалот е невозможно да дадеш ветување“ вели Лаутаро Мартинез.