Тренерот на ЦСКА Софија, Љубо Пенев си замина од кормилото на 31-кратниот бугарски шампион по неполни три месеци, и ја обвини управата на клубот дека не застанала зад него.
52-годишната легенда на бугарскиот фудбал го замени Нестор Ел Маестро на чело на „армејците“ во февруари со договор на година и пол, враќајќи се во клубот со кој освои две титули како напаѓач постигнувајќи 88 гола во 123 меча.
„Пред три месеци се согласив да ја преземам ЦСКА во тежок период за клубот и имав огромна желба да го оствариме максимумот во лигата и во купот. Но, менаџментот на клубот реши да не ме поддржи. Постојано имаше тивка, но лута опозиција против мене“, вели Пенев.
На пет меча пред крајот на Првата лига, ЦСКА се втори во лигата со 65 поени, пет помалку пред шампионот Лудогорец. Добромир Митов, поранешниот дефанзивец на клубот, е поставен за привремен тренер.