Поранешниот дефанзивец на Ливерпул, Дејан Ловрен вели дека Јирген Клоп му кажал дека тој недостасува во тимот, но инсистира дека не се кае што замина од „Енфилд“ и потпиша договор со Зенит Санкт Петерсбург.
31-годишниот Хрват си замина од Ливерпул по шест сезони и 185 настапи, откако добиваше големи критики за својата игра и добиваше се помалку шанси од Клоп, по што стана столб на одбраната на рускиот клуб. Од друга страна, Ливерпул се најдоа во дефанзивна криза по повредите на Виргил ван Дајк и Џо Гомез, и Ловрен вели дека сега би сакале тој да е таму.
„Не, воопшто не жалам за трансферот. Одлуката минатото лето беше цврста, да си заминам од Ливерпул и да не гледам наназад. Бев навреден минатата сезона кога не играв, но сега е поинаку. Мислам дека повеќе им недостасувам на Ливерпул, отколку тие мене. Јирген Клоп го знае тоа, бидејќи уште зборуваме. Ми напиша неодамна: ‘Ни недостасуваш’“, вели Ловрен за рускиот „Спорт-експрес“.