Селекторот на Италија, Роберто Манчини, пред натпреварот со Турција зборуваше за случајот со Манчестер Сити, клубот што го водеше од 2009 до 2013 година, како и за обвинувањата за „двоен договор“ што го имал за време на престојот на „Етихад“.
Манчестер Сити веќе долго време се соочува со обвинувања за кршење на финансиските правила на Премиер лигата, а меѓу прашањата што се појавија за време на постапката беше и договорот на тогашниот менаџер Манчини. Италијанскиот стручњак, не сакаше премногу да се задржува на оваа тема.
„Не верувам дека Манчестер Сити е прогласен за виновен, напротив. Тоа не е проблем што ме засега, а не е ни нешто ново. Манчестер Сити не е виновен, а што се однесува до двојниот договор, тоа не е мој проблем, туку можеби нивен“, рече Манчини.
Во центарот на вниманието е аранжманот од периодот во кој Италијанецот го водеше Сити. Покрај договорот со англискиот клуб, Манчини имал и консултантски договор со Ал Џезира од Абу Даби, клуб поврзан со сопственикот на Манчестер Сити, шеикот Мансур.
Според италијанските медиуми, според основниот договор со Сити, Манчини заработувал околу 1,69 милиони евра нето годишно, додека вториот договор му носел уште 2,03 милиони евра годишно.
Токму овој аранжман е еден од деталите што се разгледуваат во случајот поврзан со финансиското работење на Манчестер Сити.
Манчини пристигна на „Етихад“ во декември 2009 година, а со Сити ја освои Премиер лигата, ФА Купот и Комјунити Шилд.
Титулата од сезоната 2011/12, прва за Манчестер Сити по 44 години, освоена на драматичен начин со голот на Серхио Агуеро против Квинс Парк Ренџерс во последните секунди од сезоната, ќе биде особено запаметена. Италијанецот го напушти клубот во мај 2013 година.
Foto/ Depositphotos