Марк Хјуз во првиот меч на клупата на Саутемптон ги предводеше „светците“ до 2:0 победа на гости кај Виган и пласман во полуфиналето на ФА купот, со што им е гарантиран меч на „Вембли“.
Последниот меч на Хјуз како тренер на Стоук беше засрамувачкиот пораз од третолигашот Ковентри во третото коло на ФА купот во јануари, но сега ќе го предводи Саутемптон во големата завршница.
Виган постави голем притисок на гостите, пред во 62. минута Пјер-Емил Хојбјерг да го постигне својот прв гол во дресот на Саутемптон во 54. настап, а гостите имаа шанси да го решат натпреварот во 73. минута кога Маноло Габијадини стрелаше од пенал, но Кристијан Валтон му го одбрани ударот. Седрик Соареш излета сам пред одбраната на Виган во последните моменти на мечот за комплетирање на триумфот.