Мауро Икарди е на чекор од заминување од Пари Сен-Жермен поради конфликтот со неговиот аргентински сонародник Лионел Меси, тврди британскиот „Дејли мирор“.
Меси наводно се „раскарал“ со Икарди во октомври, додека самиот Икарди смета дека токму поради оваа антипатија тој не е повикан во аргентинската репрезентација повеќе од три години. 28-годишниот Икарди наводно не е во плановите на тренерот Маурисио Почетино, а во клубот уште му замеруваат за неговиот приватен живот, кој неодамна стана јавен по неверството кон неговата сопруга (и агент), Ванда Нара и смирувањето преку социјалните мрежи.
Јувентус подолго време се заинтересирани за поранешниот напаѓач на Интер, но во моментов во Торино не се подготвени да дадат многу пари, посебно додека трае истрагата за лажното пријавување на повисоки трансфери од реалната исплата. Од друга страна, Алваро Мората е пред портите на Барселона, и Макс Алегри мора да смета за иднината. Друга опција, помалку веројатна, е Манчестер јунајтед, кои во Икарди би имале „привремено“ решение ако Единсон Кавани замине.