Новокрунисаните француски шампиони Пари Сен-Жермен го доживеаја третиот пораз во четири меча во Лига 1, откако Монпелје направи чудесен кам-бек за 3:2 победа во заостанат меч од шампионатот.
Со повратникот Нејмар како стартер, ПСЖ го доживеа само четвртиот пораз оваа сезона, и тоа откако двапати беше во водство. Парижани поведоа уште во 12. минута со автогол, но девет минути подоцна Монпелје израмни, исто така со автогол. Анхел ди Марија во 62. минута повторно ги донесе гостите во водство, пред домаќините да направат целосен пресврт за пет минути, со два гола во 80. и 85. минута.
Со оваа победа, Монпелје се на петтото место на табелата со 54 поени, пет помалку од четвртопласираниот Сент-Етјен.