Поранешниот холандски фудбалски репрезентативец Весли Снајдер смета дека можел да има играчка кариера како Лионел Меси и Кристијано Роналдо.
Снајдер (38) со Интер во 2010 година ги освои Лигата на шампионите, Серија А и Купот на Италија, но таа година „Златната топка“ за најдобар фудбалер на светот му припадна на Меси, додека Холанѓанецот беше четврти.
„Можев да бидам како Роналдо и Меси, но… Уживав во животот, понекогаш пиев чаша вино после вечерата. Лео и Кристијано се различни, жртвуваа многу. И тоа е во ред, но мојата кариера е сепак неверојатна“, изјави Снајдер.
Тој кариерата ја започна во Ајакс, а потоа играше за Реал, Интер, Галатасарај, Ница и Ал-Гарафа.
За холандската репрезентација постигна 31 гол на 134 натпревари, а со репрезентацијата го освои второто место на Светското првенство во Јужна Африка 2010 година.