Хрватскиот фудбалски тренер, Нико Ковач оствари голем успех со екипата на Монако. По победата на клубот од Кнежевството кај Ница, во 16-финалето од францускиот Куп (2-0) Нико Ковач ја забележа 19-тата победа во 30-тиот меч на клупата на Монако сезонава. Со тоа оствари 63% победи откако е на кормилото на клубот кој претходните сезони се бореше за опстанок.
Во историјата на клубот, Монако осумпати бил шампион на Франција и петпати го освојувал Купот, а на клупата на екипата биле имиња од калибарот на Арсен Венгер, Жан Тигана, Дидие Дешам, Клаудио Раниери и Леонардо Жардим. Само еден тренер остварил подобар резултат од Ковач во првите 30 меча на кормилото.
Тоа е Анџело Гризети и тоа во далечната 1952/53 година. Тој тогаш имал 67.5% успешност.
Ковач има одлична сезона со Монако, пред две недели кај Стразбур во Лига 1 екипата го доживеа првиот пораз (1-0) по 12 меча без пораз, од кои 10 беа победи.
Во моментов во првенството Монако е на четвртата позиција со -7 бода од лидерот Лил.