Кшиштоф Пјатек е решен да ја освои Италија за една сезона! Полската напаѓачка сензација доминираше со головите во Џенова, пред Милан да го донесе во јануари како замена за Гонзало Игуаин и тој веднаш им врати со два гола за 2:0 победа над Наполи и пласман во полуфиналето на Копа Италија.
Пјатек дебитираше за Милан како замена во саботниот дуел од Серија А со истиот противник, кој заврши 0:0, но во вторникот беше неверојатен! Во 12. минута тој доби одлична долга топка од Диего Лаксалт за да не покаже милост и од петнасетина метри да го постигне својот прв гол по трансферот вреден 35 милиони евра.
Лоренцо Инсиње врати на другата странам приморувајќи неколку одбрани на Џанлуиџи Донарума, но Пјатек во 27. минута „удри“ повторно, смирувајќи ја топката на гради, поминувајќи го Калиду Кулибали за уште еден убав гол, со што тој има постигнато повеќе голови во првите 46 минути игра во дресот на „росонерите“ отколку Игуаин во последните 12 натпревари за клубот.
Милан во полуфиналето на националниот куп ќе игра со подобриот од дуелот помеѓу Лацио и градскиот ривал Интер.
Фото: ЕПА