Седмото коло во Првата лига донесе два изненадувачки домашни порази на лидерот Академија Пандев и на шампионот Шкендија, по што на Вардар му беше доволна минималната победа од 1:0 над Силекс за да се искачи на првото место на табелата.
Шкендија „падна“ во второто полувреме во Тетово губејќи со 0:2 од Победа, откако прво Киријан Нвабуезе постигна одличен гол во 61. минута, за Танушев да ја потврди победата во 87. минута и да му го нанесе на шампионот првиот пораз во новата сезона.
Сличен „шок“ доживеа и досегашниот лидер, Академија Пандев, откако Ренова со двата гола на Влатко Стојановски дојде до импресивна 2:0 победа во Струмица, и овие резултати ги искористи Вардар, откако тимот на Александар Васовски стигна до минимална победа над Силекс благодарение на голот на Јуфо во 71. минута.
Изненадувачките резултати ги потврди и Македонија ЃП, која го „разби“ Работнички со 3:0, додека Беласица сврза две победи во низа по 1:0 победата над Шкупи.
Вардар сега е прв на табелата со 17 поени, два повеќе од Академија Пандев и три пред Шкендија.
ПРВА ЛИГА, 7.КОЛО
Академија Пандев – Ренова 0:2
Беласица – Шкупи 1:0
Македонија Ѓорче Петров – Работнички 3:0
Шкендија – Победа 0:2
Вардар – Силекс 1:0
ТАБЕЛА: 1.Вардар 17, 2.Академија Пандев 15, 3.Шкендија 14, 4.Победа 11, 5.Работнички 9, 6.Беласица 8, 7.Ренова 7, 8.Македонија Ѓорче Петров 6, 9.Шкупи 5, 10.Силекс 5.
Фото: ФК Вардар