Денес на 21.Светско првенство во фудбал ќе заврши првото и ќе започне второто коло. На програмата се две средби од Х-групата и една во А-групата.
Мундијалската програма ќе започне во 14 часот во Саранск на Мордовиа арена. Четврт-финалистот од минатото светско првенство Колумбија за противник ќе ја има Јапонија. Интересно овие две репрезентации беа во иста група и на СП во 2014 година. Колумбија пред четири години славеше убедливо со 4:1.
Вториот натпревар, со кој ќе заврши првото коло на СП во Русија ќе го одиграат Полска и повратникот на светските првенства Сенегал. Дуелот ќе се одигра на Откритие арена, стадион на Спартак Москва, а започнува во 17 часот.
Од 20 часот, Русија и Египет ќе го отворат второто коло на 21.Светско првенство. Русите уште вечерва можат да обезбедат место во осмина-финалето, секако доколку забележат победа.
Во првото коло Русија убедливо ја победи Саудиска Арабија со 5:0, додека Египет во финишот беше поразен од Уругвај со 0:1.
Првиот натпревар од второто коло се игра во Санкт Петербург на стадионот на Зенит.