Претседателот на фудбалскиот клуб Спортинг, Федерико Варандас, ги негираше извештаите дека постои џентлменски договор според кој шведскиот напаѓач Виктор Ѓокереш би можел да го напушти клубот за 59 милиони фунти. Првиот човек на клубот тврди дека досега не добиле ниту една конкретна понуда за напаѓачот.
„Можам да гарантирам дека Виктор Ѓокереш нема да замине за 60 милиони евра плус 10 милиони евра бонуси, бидејќи никогаш не го ветив тоа. До денес, Спортинг не добил никакви понуди за Ѓокереш, ниту денес ниту минатата сезона“, рече Варандас на прес-конференција, како што објави Би-Би-Си.
Швеѓанецот, кој има 27 години, постигна 97 гола на 102 натпревари во текот на две сезони со Спортинг, а претходно играше за Ковентри три години. Неодамна беше поврзуван со можен трансфер во Манчестер јунајтед или Арсенал.
Неговиот договор со Спортинг има откупна клаузула од 85 милиони фунти, но медиумските извештаи претходно сугерираа дека минатото лето е постигнат договор помеѓу клубот и играчот, напаѓачот да остане уште една сезона, а клубот да му овозможи да замине за пониска цена.
Варандас објасни дека единствената отстапка што ја направил клубот била дека нема строго да инсистираат на целиот износ на клаузулата.
„Една од најголемите загрижености на неговиот агент беше дали ќе бараме откупната клаузула да биде исплатена во целост. Тој сакаше гаранции, а единствениот договор беше дека Спортинг нема да бара цели 100 милиони евра“, рече Варандас.
Тој додаде дека во тој момент не било можно да се дефинира износот на потенцијалниот трансфер.
„Во тоа време реков: нема смисла да се одредува бројка однапред бидејќи не знаеме што ќе се случи за една година. Може да биде 40 милиони евра, 60 милиони евра или 80 милиони евра. Она што можам да го гарантирам е дека нема да барам 100 милиони евра“, заклучи претседателот на Спортинг.