Рио Фердинанд смета дека сега е вистинското време неговиот стар пријател и поранешен соиграч, Оле Гунар Солскјер да ја „предаде палката“ во Манчестер јунајтед и самиот да си замине од клубот.
Иднината на норвешкиот тренер повторно е неизвесна по лошата форма на тимот кој загуби четири од последните шест меча, вклучувајќи две домашни посрамотувања – 0:5 од Ливерпул и 0:2 од Манчестер сити. На ова се надоврзаа шпекулациите за бунт на Бруно Фернандеш и Кристијано Роналдо во соблекувалната, иако од клубот најавуваат дека нема да има брза смена на тренерот.
Фердинанд, како поранешен соиграч на Солскјер, долго време го поддржуваше Норвежанецот по неговото именување во 2018 година, но сега се сомнева дека тој може да донесе некој трофеј на „Олд Трафорд“.
„Ја почнавме сезоната со многу надеж и по одличните трансфери, со возбуда. Сите си помисливме: ‘Ова е нашето време’. Оле не донесе до овој момент. Беше донесен во клубот да го среди тимот, да ги донесе играчите за да освојуваме титулата. Сега, седам тука и не мислам дека можеме до лигата. Го гледам тимот секоја недела и си мислам што ќе направиме тактички. Не гледам филозофија или идентитет во начинот на играње како Манчестер јунајтед. Збунет сум. Тоа што го видовме оваа сезона, покажува дека тој треба да ја предаде палката на некој друг кој може да не однесе таму. Мислам дека Оле треба да си замине сам со високо крената глава, бидејќи од позицијата која бевме до тоа каде што бевме на почетокот на сезоната беше позитивно“, вели Фердинанд.
Според Фердинанд, главниот проблем за Јунајтед е што никој од фудбалерите не се „плаши“ од Солскјер.
„Кога го гледам нашиот тим, сметам дека фудбалерите не се во страв, немаат интезитет, не го даваат максимумот, и тоа е знак на непочитување на менаџерот. Секој менаџер кој успеал во овој спорт, носел страв со себе. Клоп, Пеп, Тухел, Ферги во мое време, Џорџ Греем и Арсен Венгер во Арсенал… Кај сите имаше фактор: ‘Ако не го правиш тоа што го кажувам, тогаш ќе седиш на клупа’. Таков страв нема во овој тим и тоа не е исправна работа“, додава Рио.