Еден од најдобрите фудбалери на сите времиња, Кристијано Роналдо, од летово е играч на Јувентус, а деновиве го имал своето прво големи интервју за „Газета дело спорт“. Едно од прашањата било и за неговиот опонент од Барселона, Лионел Меси. Тој открива дека не му недостига Меси и воопшто шпанската лига.
„Можеби јас него му недостигам. Сум играл во Португалија, Англија, Шпанија, сега сум во Италија, додека тој цело време е во Шпанија. Изгледа дека јас него повеќе му требам. Би сакал еден ден да дојде во Италија. Да го прифати предизвикот. Меси еве ти предизвик, дојди во Серија А. Сепак, доколку е задоволен во Барселона, јас тоа морам да го почитувам. Меси е неверојатен играч и добро момче“, рекол Роналдо.
Португалецот летово по девет години го напушти Реал и за сума од 100 милиони евра се пресели во Јувентус. Не го крие задоволството од досегашниот престој во Торино.
„Можам да кажам дека ова е најдобриот тим во кој сум играл. Ова е тим. Во некои други клубови некои играчи се чувствуваат дека се поголеми од другите. Во Јувентус тоа не е така. Сите се скромни, сите сакаме само да победиме. И кога нема да постигнат гол, Дибала или Манџукиќ се среќни поради победата. Тоа е добро. Не можам да кажам дека играчите не се скромни, но тука е некако поинаку“.
Роналдо исто така рекол дека од поранешните соиграчи би сакал да го види во Јувентус Марсело, но дека за засилувањата решава претседателот.
Од почетокот на сезоната Роналдо има постигнато 11 гола на одиграни 19 натпревар во сите натпреварувања.