Досегашниот селектор на француската фудбалска репрезентација, Дидие Дешан, последен пат ѝ се обрати на јавноста во таа улога по поразот од Англија (6:4) во натпреварот за третото место на Светското првенство. Во емотивното обраќање тој го анализираше својот последен натпревар, ја презеде одговорноста за неуспехот и официјално потврди дека се повлекува, најавувајќи дека селекторската функција ќе му ја предаде на Зинедин Зидан.
Дешан призна дека неговата репрезентација влегла во натпреварот со преголем притисок, што довело до многу лошо прво полувреме.
„Подобро ќе беше да завршевме како трети, но тоа, за жал, не беше можно по катастрофалното прво полувреме. Малку и се налутив. Благодарение на гордоста и инаетот, за малку ќе ја свртевме ситуацијата која изгледаше безизлезна“, изјави Дешан, додавајќи дека играта во второто полувреме многу повеќе личела на вистинската Франција.
Селекторот целосно ја презеде одговорноста за тактичките одлуки.
„Требаше да изберам поинаку уште од самиот почеток, слободно напишете го тоа. Можеби тогаш сѐ ќе беше подобро. Јасно е дека некои играчи можеа да одиграат подобро, но јас сум тој што ги избира.“
Осврнувајќи се на критиките на Адриен Рабио за, како што ги нарече, „недозволивите работи“ што се случувале, Дешан остана воздржан.
„Денес нема да расчистувам сметки. Играчите добро знаат за што станува збор, јас секогаш сѐ им кажувам в лице. Одлучив да го ротирам составот затоа што тоа беше логично по полуфиналето со Шпанија. Шанса добија оние што имаа помала минутажа, но не можев ни да замислам дека ќе имаме толку многу проблеми“, рече Дешан.
Тој откри дека на полувремето размислувал да замени дури осум фудбалери, но на крајот направил четири измени.
Говорејќи за своето заминување по циклусот што започна во 2012 година, Дешан не ги криеше емоциите.
„Првпат си реков: ‘Ова го правиш последен пат’. Добив многу пораки, а две или три ме расплакаа. Ова е крај на периодот што го претставуваше најубавиот дел од мојата работа. Репрезентацијата секогаш ја ставав над сѐ. Тоа им го кажав и на играчите – можат да настапуваат за најголемите клубови во светот, но ништо не е над националниот тим. Горд сум што толку долго ѝ служев на репрезентацијата и што ја оставам во самиот светски врв.“
Посебно се осврна и на капитенот Килијан Мбапе.
„Килијан е извонреден играч. Сликата што јавноста ја има за него не одговара на тоа каков е навистина. Беше одличен капитен, пример за сите во текот на целото првенство и воопшто не жалам што токму нему му ја доверив капитенската лента.“
На крајот, Дешан порача дека има целосна доверба во својот наследник Зинедин Зидан.
„Потенцијалот постои. Тука се одлични играчи кои ќе напредуваат благодарение на ова искуство. Постојат сите предуслови Франција да остане во самиот врв. На репрезентацијата и на мојот наследник им посакувам сѐ најдобро. Од денес ќе бидам само нивен тивок навивач.“