Хозе Луис Мендилибар (62) дојде во Севилја да ја спаси од борбата за опстанок, а сезоната ја заврши со трофеј во Лига Европа. Севилја наредната сезона ќе биде носител на ждрепката за Лигата на шампионите.
Пред два месеци, по понижувачкиот пораз од Атлетико во Мадрид (6:1), Севилја реши да го отпушти Аргентинецот, Хорхе Сампаоли. На општо изненадување реши да го ангажира Мендилибар.
Искусниот тренер, никогаш во кариерата не водел клуб кој има големи амбиции. Во 2021 испадна од Примера со Еибар, а следната сезона и со Алавес.
Мендилибар успеа да одговори на предизвикот. Ја извади Севилја од опасната зона, во Лига Европа ги елиминираше Манчестер јунајтед и Јувентус, а потоа стана првиот тренер кој успеал да добие европско финале против Жозе Мурињо.
Очекувано, по големиот успех, Севилја реши да му понуди нов договор на искусниот тренер. Актуелниот му истекува на крајот од сезоната.
Не е познато каков ќе биде договорот, но се претпоставува дека Севилја ќе му понуди две годишен договор.