Тренерот на Реал Мадрид, Сантијаго Солари, истакнал дека пристапот во саботното „Ел Класико“ треба да биде исто како во средата, кога Реал играше добро, но не постигна гол, а прими три и беше елиминиран од Купот на Шпанија.
„Го чекаме ова дерби исто како што го чекавме и претходното. Желбата останува иста“, рекол Солари.
Барселона во првенството има девет бода повеќе од Реал, но Солари не верува дека мечот може да биде пресуден околу борбата за титулата.
„Сите натпревари имаат еднакво значење. И за два месеци да ми го поставите истото прашање ќе добиете ваков одговор“.
По првенственото „Ел Класико“, Реал го очекува уште еден тежок натпревар. Во вторник во Мадрид ќе гостува Ајакс во осмина-финалниот реванш, во Лигата на шампионите.
„Сега не размислуваме за дуелот со Ајакс. Фокусирани сме за мечот што е пред нас, а судбината сакаше тоа да биде Барселона“, рекол тренерот на Реал.
Првенственото „Ел Класико“, во Мадрид, се игра утре со почеток во 20.45 часот.