Ригоберт Сонг повеќе не е селектор на Камерун, објави претседателот на Фудбалскиот сојуз, Самуел Ето.
„Сонг му донесе многу на овој тим, но законите на фудбалот се такви. Не ги постигнавме нашите цели и неговиот договор, кој истече денеска, нема да биде продолжен“, изјави Ето за француски „Лекип“.
Камерун беше елиминиран во осминафиналето на Африканскиот куп на нации од Нигерија, па разделбата со Сонг беше очекувана.
Сонг (47) во својата тренерска кариера ја водеше само репрезентацијата на Камерун, а на клупата седна во 2022 година.
Најголемиот успех што го постигна е победата над Бразил (1:0) на Светското првенство во Катар, но Камерунците не успеаја да ја минат групата во која беа и Швајцарија и Србија.