Поранешниот дефанзивец на Манчестер јунајтед, Рио Фердинанд смета дека Ерик Тен Хаг покажува „непочитување“ кон капитенот Хери Мегваер и му советува на англискиот сонародник да си замине од клубот.
Тен Хаг по првите неколку натпревари од сезоната реши Рафаел Варан и Лисандро Мартинез да бидат неговите централни бекови, а кога не беше достапен Мартинез, го постави Лук Шо на оваа позиција, оставајќи го пак Мегваер на клупата и покрај неговите солидни настапи на Мундијалот во Катар со Англија. Фердинанд смета дека тој мора да си замине.
„Да сум на негово место би си заминал сега. Лук Шо игра како централен бек наместо него! Тоа е како јас да се вратам од СП каде што сум играл добро и Патрис Евра да игра бек! Би сакал да го задавам Патрис, да го уништам на тренинг. Би отишол кај менаџерот и би го прашал: ‘Зошто се зае.аваш со мене?’ Хери Мегваер може да замине. Игра само кога имаат многу натпревари, односно во куп мечеви“, вели Фердинанд.
Мегваер беше поврзуван со трансфер во Астон вила откако беше забележан во близината на тренинг-центрот на клубот во Бирмингем со својот агент, иако ова потоа беше демантирано. Тој има договор со Јунајтед до 2025 година.