Гранада се опорави од поразот од Реал Мадрид и ја продолжи одличната сезона, откако во драматичен меч со три црвени картони и поништен гол со 2:1 ја совлада Валенсија, турнувајќи ги „лилјаците“ во борба за опстанок.
Мечот започна со поништениот гол на Кенеди за Гранада во 15-тата минута, по што гостите дојдоа во водство преку Кевин Гамеиро во 36. минута, пред Кенеди да израмни во финишот на полувремето. Во второто полувреме за три минути Валенсија остана со девет играчи на теренот – прво Жасон доби втор жолт картон во 70-тата минута, за во 73. минута Гонсало Гуедеш да добие директен црвен картон.
И Гранада остана со играч помалку откако Дуарте во 76. минута доби црвен картон, за во 88. минута Хорхе Молина да донесе 2:1 победа на клубот од јужна Шпанија.
Гранада е на седмото место на табелата со 24 поени, еден зад Барселона на шестото место, додека Валенсија е 16-та со 15 поени, и само гол-разликата ги држи над зоната за испаѓање.