Легендарниот фудбалер на Зенит и Баерн Минхен, Антолиј Тимошчук, рекордер по број на одиграни натпревари во украинската репрезентација, нема да може да влезе во својата земја во следните десет години.
Ова го открива указот за санкции потпишан од претседателот на државата, Владимир Зеленски, кој се однесува на над сто јавни личности.
Тимошчук, претходно беше избришан од регистарот на Фудбалскиот сојуз на оваа земја, а ја загуби и тренерската лиценца, бидејќи одби да ја напушти функцијата во стручниот штаб на Зенит од Санкт Петербург по избувнувањето на војната во Украина.
Тој го држи рекордот по број на натпревари за репрезентацијата со 144 настапи.
Со Зенит ја освои Лига на Европа, во славната генерација во која меѓу другите беа Павел Погребњак и Андреј Аршавин, а потоа и Суперкупот на Европа со победата над Манчестер јунајтед.
Подоцна се пресели во Баерн, со кого ја освои Лигата на шампионите, како и три трофеи во Бундеслигата. Во Украина играше за Шахтјор Доњецк.