Усаман Дембеле има важечки договор со Пари Сен Жермен до јуни 2028 година, но францускиот репрезентативец и еден од најбогатите клубови во светот започнаа преговори. Сепак, постои голема веројатност дека нема да има договор и продолжување на соработката, бидејќи двете страни се драстично различни во однос на финансиите.
Официјално најдобриот фудбалер во светот за сезоната 2024/25, преку своите менаџери, бара годишен приход од неверојатни 60 милиони евра, додека „светците“ не помислуваат да му ја плаќаат таа сума, на секои 12 месеци, без оглед на тоа што клубот нема проблем со финасиите.
Засега станува збор за неофицијални информации од француските медиуми, а времето ќе покаже колку вистина има во нив, односно дали ќе има компромисно решение или Дембеле, предвреме, ќе се најде во ситуација да бара нов клуб.
Дембеле пристигна на „Паркот на принцовите“ во 2023 година, во трансфер од Барселона, а пред да игра за шпанскиот клуб го носеше дресот на Борусија Дортмунд. Тој кариерата ја започна во Рен.