Валенсија стигна до минимална 1:0 победа над Реал Бетис во вториот меч од полуфиналето на шпанскиот кралски куп за да се пласира во големото финале, каде што ќе се соочи со Барселона, кои вчера го елиминираа Реал Мадрид со 3:0 победа на „Бернабеу“.
Првиот меч во Севилја заврши 2:2, а во реваншот клучниот момент на „Месталја“ се случи во 56. минута, кога Кевин Гамеиро одлично го пронајде Родриго, кој ја затресе мрежата на Роблес.
Валенсија, клубот кој е шесткратен шампион на Шпанија и седумкратен освојувач на Копа дел реј, ќе ја брка својата прва титула по „сушниот“ период од 11 години – тие последен пат го освоија купот во 2008 година, кога со 3:1 го победија Хетафе.
Фото: ЕПА