Во 4. коло од Лигата на шампионите, фудбалерите на Јувентус вечерва ќе го пречекаат Спортинг од Лисабон.
Пред натпреварот, тренерот на „Старата дама“, Лучано Спалети зборуваше за подготовките на тимот, статусот на некои од фудбалерите и амбициите на клубот за сезоната.
Спалети истакна дека напаѓачот Душан Влаховиќ и дефанзивецот Андреа Камбијасо се фундаментални за тимот.
„Андреа е силен и модерен играч кој може да се снајде на неколку позиции, но мора да се подобри во играта со глава. Душан има мала предност бидејќи знае што е Јувентус и го знае притисокот што владее во клубот. Разговарав со него и тој би бил повеќе од среќен да остане тука, само фудбалот му е во главата“, рече Спалети.
Тренерот на Јувентус ја означи борбеноста како главен рецепт за победа над лисабонскиот тим, истакнувајќи дека му се допаднала енергијата која ја покажале неговите играчи во триумфот над Кремонезе.
По 10 кола од Серија А, Јувентус е на шестото место на табелата, четири бода зад лидерот Наполи, додека имаат освоено два бода во Лигата на шампионите.