Фиорентина се искачи на петтото место во италијанската Серија А, откако на гостувањето кај Болоња стигнаа до 3:2 победа со уште еден гол на српскиот напаѓач Душан Влаховиќ, кој веќе стигна до неверојатни 13 гола во 16 меча во првата лига.
Јусеф Малех ги донесе гостите на „Ренато дал’Ара“ во водство во 33. минута, но Болоња израмни преку Муса Бароу во 42. минута од мечот. Кристијано Бираги ја врати предноста на Виола во 52. минута, пред Влаховиќ од белата точка во 67. минута од мечот да направи предност од два гола. Шкотскиот тинејџер, Арон Хики најави интересен финиш на мечот кога намали на 2:3 во 83. минута, но на крајот трите поени заминаа за Фиренца.
Фиорентина сега се петти со 27 поени, седум зад Аталанта, и два пред Рома, додека Болоња се осми со 24 поени.