Дефанзивецот на Манчестер Сити, Кајл Вокер, го спореди играчот од средниот ред на „граѓаните“, Илкај Гундоган, со легендарниот Зинедин Зидан. Капитенот на Сити е во одлична форма, откако на последните два натпревари за тимот на Пеп Гвардиола постигна дури четири гола.
„Видов неколку објави на Твитер и се пошегував со Гундо за тоа како во последните неколку месеци стана како Зидан од најдобрите денови. Понекогаш треба да почнете да блескате и Илкај го направи тоа во вториот дел од оваа сезона“, изјави Вокер за официјалната веб-страница на Манчестер Сити.
Според медиумите во Шпанија, Барселона веќе има начелен договор со Гундоган за следната сезона.
Фудбалерот од средниот ред игра за Манчестер Сити од јули 2016 година и неговиот актуелен договор истекува на крајот од сезоната. Тој сезонава има 47 настапи во сите натпреварувања, постигна девет гола и седум асистенции.