Кошаркарите на Соединетите Американски Држави ја постигнаа втората победа во групната фаза на Мундобаскетот откако во Пасај ја совладаа селекцијата на Грција со резултат 109:81 (23:19, 27:18, 29:19, 30:25).
Иако избраниците на Димитрис Итудис подобро го започнаа натпреварот, Американците кон средината на првата четвртина ја презедоа иницијативата и успеаја да поведат.
Вториот дел целосно им припадна на Американците кои остварија двоцифрена предност, со која заминаа на одмор, а после тоа веќе стана јасно дека Грција тешко ќе приреди изненадување против првиот фаворит на турнирот.
На крајот, САД постигнаа 109 поени и стигнаа до поубедлива победа отколку против Нов Зеланд и се пласираа во втората фаза на СП.
Одлуката за вториот тим што ќе продолжи во следната фаза ќе ја донесе директната пресметка меѓу Грција и Нов Зеланд, додека Јордан ќе се збогува од Мундобаскетот по мечот против Американците.
Ривс со 15 поени ги предводеше САД до победата, Бренсон и Едвардс додадоа по 13, додека Портис постигна 10.
Кај Грција, Папајанис постигна 17 поени, а Рогкаволупулос 14.